Rev 6 | BEF | STEP | To nani nubu bu go saga huto bu go'ohuna. Ya'ma sipisipi nala'auba pepa naga'i 7 gi'ahana'a lito napa 1 naga'i i hepulu tito li paka nosago to kene'i amuya moloto minolatana loebe loebe enalitogati moneuba ai kokililika suhi luto kehe i'ehina: Obo, luto ligo keheli'ohuna.

Revelation of John 6

Sipisipi nala'auba pepa naga'i i hepulu tito li paka so'ehina

1 To nani nubu bu go saga huto bu go'ohuna. Ya'ma sipisipi nala'auba pepa naga'i 7 gi'ahana'a lito napa 1 naga'i i hepulu tito li paka nosago to kene'i amuya moloto minolatana loebe loebe enalitogati moneuba ai kokililika suhi luto kehe i'ehina: Obo, luto ligo keheli'ohuna. 2 Ya ligo hosi yaga koholina mone ago bu go'ohuna yabe. Gupisa'alo bo mone ai gimi'a lito nohigo sekele mamu'a hiti kakili'mo emilago luba nasana be ligito buto ana'ina silaga'i be ligilube'mu bu'ehina.

3 To sipisipi nala'auba pepa naga'i napa 2 i hepulu tito paka solago kene'i amuya moloto minolata napa 2 ai kehe ito lu'ehina: Obo. 4 Ya ligo hosi yaga safa'i mone huto huloto o'ehina. Gupisa'alo ya'ma bo mone mino'ehina ya'ma melugu nasana li he'milenogo bona'magi enali ai ho filinogo ai ho filinogo hilabe luto yamofihi amuya'a emi'ehina to luba sipi li huto hilina yamofihi amuya emita'i yatamalo emilago lito mino'ehina.

5 To sipisipi nala'auba pepa naga'i napa 3 i hepulu tito paka solago kene'i amuya moloto minolatana napa 3 ai'a kehe ito lu'ehina: Obo, luto ligo nani kehelito nubu bu go saga huto bu go'ohuna. Bu nogogo hosi yaga nupa'i mone huto huloto o'ehina. Bo mone gupisa'alo mino'ehina. Ai yaha'atu guna malalina nasana sikeli yabe mone liloto mino'ehina. 6 To kene'i amuya moloto minolata loebe loebe nasanamagihi folagaha'anigu bona'magihi nogo'a legitana huto huloto ya'ma luto ligo keheli'ohube: Nose'na masu loebe loebe yanamofihi mina'a moneko kina to kile'mofihi masu'i loebe monebe moneko kina eto eto hu epilo to oliba nogoya'a to bai nagami'i ya'ma li sibina mehilo.

7 To sipisipi nala'auba ai pepa naga'i napa 4 i hepulu tito paka solago kene'i amuya moloto minolatana napa 4 ai kehe ito lu'ehina: Obo, luto ligo keheli'ohuna. 8 Ya huto nubu bu go saga huto bu nogogo hosi yaga mone gufa'a okoho tegi huto lo'ehina ya'ma ago bu go'ohuna. To bo mone gupisa'alo nominana ya legi huto gi'a Fililatana ya'ma to megesalo mege'i moloto o'ehinamofihi gi'alo ya'ma Kene Mala Mala'na yabe gi'a mele'ahana. To etali melugu bona'i kupa loebe loebe fi hala'ibe lite neago li gehesa mone ya'ma luba to kau'na sipi to besise luna lana to lopi kafa'nama luba nasana ya'ma huto hite bona'i enele'mo sibina hilabe luto yamofihi enoho fililo luto amuya etimi'ehina.

9 To sipisipi nala'auba pepa naga'i napa 5 i hepulu tito paka solago bu go'ohuna. Bona'magi Hu'mamofihi ka'a lu yege hete minete li futili hi'ahana'mu yabe lite enoho fili'ahana yabe. Enali enemehi ya'ma fifa ilata nehana mamufa gilata hitamofihi maha'aga nehago bu enogo'ohuna. 10 Enali kaga kehe sipi ite ma lite li'ahana: Sipi Boti hetofa hiti lamana'a kai kana'a sipi le'mo yatama hu'ahane. Kai golahati'mu foipana melugu bonatoga ni'ina ya'ma hiya yupahi kaga'ani loko huto pa salane? 11 Ya lite lilago koholi gukete hapa'a gu'i enemeto enemeto epi su holoto ma luto lu epi'ehina: Agoya yagapana'i lenalalutinigi luga'a ana hite enoho fililana enali Hu'mau lu keheli'ehilina'a li eto hilina'mu geba hite nesi'asi minalo.

12 To ana'ina yamofihi ma huto bu go'ohuna: Sipisipi nala'auba ai pepa naga'i napa 6 i hepulu tito yamofihi paka nosago imima'i sipi li'ehina. Imima'i noligo yege ya'ma kotinifa gito ifi to'ehina, nupa gu'i tafa'a ya suhi lolo hu'ehina. To ikahi ya'ma gola tegi lolo hu'ehina. 13 To sonofi'i enali yasiuba noligo namopa yafa yamofihi kosaba legeya'a ligi mo i'ehina legi hite kokulumaguti melugu limo koko hi'ahana. 14 To kokuluma ai ya'ma fuka bito pepagu kelebe noguta ya suhi huto kelebe gito buto fa'menena lolo hu'ehina. To kosa to hege nagamilugu me'i ti'ehinana enali asaga'i mopo mopo hago hepa'anigati he'milete bi'ahana. 15 Ya suhi huto huto nohigo melugu enigihiti bo to kaba bo to gimi bo'animofihi kaba bo to fe'noha'ani hiti bo to amuya bo to sipi bo to lapa mebi'ehina bona'i asagatoga enali kefaha mulilugu to kosamofihi hupigu felete fala kite mine'ahana. 16 Ya hite nehite, kosa asaga'i to efahi napa'a kehe ite yibi bena nehite lu epilete ma lite li'ahana: Limite ifi te letalo. Sekele mamu'a hiti kefa hisalo minolata nohina ai bu'alo huto hu emi lalutigi to sipisipi nala'amofihi komopa'a logo bise'na'a bu go lalutigihe. 17 Logo bise'na'atitimofihi kana'a sipi huto hu'ehinagi bo moneubafi moneuba fa'mene mone ho tito meminalube'mu hibe lite li'ahana.